يامقلل من شاننا يا دريويش=يامنقص قدر الطنوخ المنابيش
يا شايف نفسه على غير داعي=الارض وخلق الارض دونك مفاريش
يومك تقول الشعر انتم ملوكه=ولغيركم من صوبكم صك تفنيش
وانك تروم المجد من كل جانب=وعالي جنابك في الليال المقاريش
لا يلحقك بالاثم عز وكبر=عيب تشوف الناس في وضع تهميش
اركد ترى للعمر حد ونهايه=واسمع كلام ما نفع فيه تشويش
تسأل وحنا من نكون بعيونك=حنا لنا في كل شمس معاريش
وحنا لنا طوله وصوله وجوله=ودايم على درب المراجل مهابيش
وحنااليمين اللي علت كل يمنى=اكرم علينا الموت ولا قول ماميش
وحنا ليا سقنا نسوق الجزيله=ماهي على سوقة هل الكيف والطيش
حنا كتبنا المجد لابه ولابه=ولا قللوها مكثرين المطاريش
وحنا ليا سدنا تسود الضراغيم= وانتم ليا سدتوا تسود الخفافيش
لو نجتمع ما هزنا كاين كان=والفرد منا لا حضر يكيفي الجيش
تلقى لنا في كل طيب شواهد=ما ثمنوها راكبين البواريش
سلم لمن سالم وطيب على طيب=وحرب على من هو نوانا بتحريش
من كف يمنانا وصبة عرقنا=ناكل ونشرب ما سألنا الحرافيش
ورجال نخوه وكاسبين المعزه=ننهش لحم ولا العظم للدبابيش
ولا نشتبه في طبع مثلك وشرواك=اللي على ذل العطايا معاويش
ونركي على الصالي مثل شربة الما=وما للرخايم بيننا رزق او عيش
من وين ما ودى النظر بك وجابي=افعالنا فوق الشوامخ نواقيش
روس الجبال وصخرة فوق ضخره=استثقلوها حاملين النواعيش
وسيوفنا نروي ظماها بحق=ونقدم على حوض المنايا عواطيش
ولا همنا من هو سبقنا يفعله=حزنا الفخر ورث ولا هو بتحويش
ليتك تخليها على طمام شايب=نموت ما تلقى علينا عكاريش
نحيا على مر ونسقيك حالي=والراس مرفوع ولا به دنادنيش
نفنى ويبقى ذكرنا مد الايام=والحر يبقى حر لو ينتف الريش