البارحه و النوم ما لجلج العين = و القلب من ضيقه يزود خفوقه
أقلب الافكار من و ين لا وين = و أعدل الموجات عيت تروقه
تحدني سود الليالي على الشين = وقت تغير ما نميز فروقه
و الرجل عيت لا تدرج على الهين = و الدم وقف ما يغذي عروقه
إن جت لنا بيمين فإنا لها يمين = و الصايمه ما هيب مثل السروقه
يقول من جرب علومه من سنين = و جسمه يبين فيه كثرت حروقه
جرب وشاف من التجارب ملايين = من صغر سنه من طروقه طروقه
يميز إلي في المواقف له يدين = من الذي كل يجيه و يسوقه
ومن الرجال الطيبين أخذ اثنين = و من المعاني كل شي يروقه
أحد عرف معنى وضيع كتابين = و أحد وجوده مثل لحظه مروقه
وأحد يحط أيديه بيدين نذلين = و أحد علومه للمراجل سبوقه
هذي علومي صغتها بيني البين = ولكل شي في السوالف طروقه