طلّت " سحايب غربتي " فوق دنياي=وعجزت أنا ألقى في زماني / مكاني
إخذيني ياأجمل مابقى من هداياي=وإلا إتركيني للمطر و .. الأغاني
لا تسأليني عن سبب كبر بلواي=ياريم أنا حتى نصيبي .. نساني !
الوقت .. عيّا .. لا يسامح خطاياي !=رغم إني اكبر من { تجاهل زماني }
كنت اترجى هالوطن يمنع إبكاي=وأثره تكاثر بي .. ( حدود الأماني )
الحزن كان بداخلي يعزف الناي !=واليوم صار أوفى صديق ٍ بكاني
والحب .. عمره ماصدق يوم وياي=ولا زلت " وافي له " ولاني أناني
لو مالقيتك فرحة الحاضر / الجاي !=ما كان للدنيا طعم ، / شكل ثاني
عزاه يادنيا التقلّب .. و عزاي !=حتى الشعر ما عاد هو الأولاني
ما ودي افتش لك خبايا زواياي !=ولا ودي احكي لك عن اللي جفاني
بردان ، ودموع الشتى تسبق إخطاي=غرقان ، والمرسى تعب من لقاني
ياريم .. وإحساس الشقى طال منفاي=وإنتي رجا الأيام .. و العمر - فاني
إذا رضيتي ؟ من " حسن حظ " دنياي !=وإذا رفضتي .. (( القلب مبطي يعاني )) !!