تعبت اكتب على شط الامل بالرمـل احلامـي = وانا اشوفه يزيل اللي كتبتـه فيـه بامواجـه
رجعت اجمع من الآصداف ياسي واجمع آلامي = كذا اتسلّى وانا أجمع ولو مالـي بهـا حاجـه
سليت بجمعها واثري نثرت آمـال أوهامـي = نظرت .. إلا يقيني منصدم ويعـود لادراجـه
رجع مذعور يبكي وارتمى في حضن اقلامـي = بعدما شاف قرش اليآس لـه نيبـان وهّاجـه
كذا يا وقت ..! يعني ما تشوفه منظر ٍ دامـي = عجبك اللي فعلته باليقين وقمـت بازعاجـه ؟
ويعني ما كفاك الجرح جبته داخلي ضامـي ؟ = تعبت ارويه من دمي زلال وتـدري احتاجـه
ويعني ما كفاك أشعل ظلامي كـل أيامـي ..؟ = أشوفه موحش و ودّي اقاوم واطفي سراجـه
حرام أغزل بيدّي من خيـوط الهـم هندامـي = وانا مبغاه .. تجبرني على لبسـه وديباجـه
جعلت المُر لي محوّر تمشّـت فيـه اقدامـي = وانا مُجبر علي ابقى سجين بداخـل سياجـه
متى تفتح من ابواب الامل لو بـاب قدّامـي = قضيت العمر عاجز ما قدرت آزيـح مزلاجـه