نسيتني وتقول مانيب ناسيك = حتى ولو قفيت مانيب ناسي
وتقول لي من قبل لامشي ابعطيك = شطر ٍ كتبته في ّ يوم انت قاسي
( لا تحسبني يوم أنا أقفيت ساليك )= واقول انا غلطان يا كل ناسي
شفني بعد فرقاك .. اهذري واناديك = اثمل على لقياك .. والشوق .. كاسي
عقبك .. احط ّ صورتك قدمي واحاكيك = اتخيّلك عندي بكل الحواسي
لغيتني والمشكله ماقدر .. ألغيك = اثر ّ الحياة اليوم .. لعبة كراسي
اترك كلام الليل يوم ان اوصيك = لاتزعج الجوّال .. وتبذ ّ راسي
ما كنت اصدق يالغلا ميّت ٍ فيك = يا لين رحت وبان فيني انتكاسي
يا ليتني مابين .. قلبك واياديك = وتروي .. عروق ٍ في ضلوعي يباسي
صحيح .. حق الموت في يد ّ.. واااليك = وان مت ّ .. علمّني لمنهو تواسي .؟
بيّحت لك سدّي .. وانا منك وإليك = لا تركن ّ .. الحب ّ العطر .. للتناسي
ارجع .. بجاه الله .. في وجه باريك = ثم جاه دمعي .. والجروح المآسي
اعلن ّ مجيّك .. قبل ترمش .. انا . اجيك = شف ّ مركب الامال .. عطني مراسي

حلو ّ السوالف منك .. يا حلو ثغرك = استغفر الله ودي أذبحك .. وآكلك ّ

يا رب تلحقني بفزعه يا إلاه العالمين = هدتني حمول الزمان ولا قدرت اشيلها
مانيب راعي منّه ولاني بصف الجاحدين = من مد ّ لي مدت كرم أدبل لها ما كيلها
حدتني الدنيا على تجليسة الراس بيدين = شربت ّ دلّه بنهّا هم ّ .. وعنايا .. هيلها
كنت أحسب ان كل قاسي بالدنيا لا بده ما يلين= وأثرّ العزايم عقب صدمات الزمن .. عزي لها
ناديت أنا عبدالمعين ! واثرّه يبا له من يعين = لجتني هموم ٍ تصاهل في ضلوعي .. خيلها

يالله يا مسقي البيدا عقب ما ضمت = بالمزنه اللي تكاشف نوض برّاقها
سبحانك الله حي ّ وباقي ٍ لا يمت ّ = اعوذ بك من غرور النفس وانفاقها
واعوذ بك من حسود ٍ يوم عينه رمت = واعوذ بك من حمول ٍ تقطم اوثاقها
من بعدها والليال السود .. ما حرّمت = تستر على اللي درق الايام ثم باقها
الوصل .. مافادنا لان السنين .. اصّرمت= وش فاد اهل السفن في لحظة اغراقها
كن السما يا طويل البال لي سلهمت = وانا اتغنى واجر ّ الصوت واشتاقها
الدرب يسحب مسافاة ٍ عليّه ارتمت = كل ماقصرت طوّلت فالبعد .. واعماقها
والصدر مرعى .. هموم وضيقة ٍ درهمت = والشعر راعي احاسيسي .. ويستاقها

الصاحب اللي يعجبه لوعة الحرف = مايدري أنه من حصاد الهمومي ..؟
مانيب شارح له متى واشرح الظرف = لا صرت متضايق وضقت .. بهدومي
الله ولا منة ّ هل النحو والصرف = اللي تفسر ّ كل بيت ٍ يزومي
شاعرك يغرف من بحور الشعر غرف = ولا جيت في سوق الهزاله واسومي
وان ماعجبك الشعر يا ناعاس الطرف = كنسل مراسيل القصايد .. وقومي