الا قال العصيمي مادهاني = شكيت الوقت واتعبني زماني
صغير السن لكن شاب راسي = من اللوعات جاني ماكفاني
وانا داله واغني للمحبه = خلي البال واصوغ الاماني
حسدت ابن الملوح في غرامه = ياحظه كيف غنى للغواني
ابي اهوا وابي اعشق واغني = وابادل بالمشاعر من هواني
الين انه صدفني من سلبني = فريد الوصف براق الثماني
وهي صدفه ولاهي اي صدفه = مع اللي مبسمه كالدم قاني
ضحك لي ثم سلب عقلي بعينه = وسلمته مفاتيح المحاني
يقول انه هواني قبل اعرفه = وانه بين خلق الله شراني
هويته مخلص من روح روحي = وزاد العشق طبع مغيراني
ما ابيه يحب حتى والدينه = لاني بالهوا دايم اناني
حسبت اني ملكته بالموده = ولكن خاب ظني يا اخواني
اعلمه الرمايه كل يومٍ = فلما صاد صيد ماعطاني
وكم علمته نظم القوافي = ونظمها بالغزل في شخص ثاني
قهرني اااه ما اكبر ماقهرني = بعد ماصار مشهورٍ جفاني
وعرفت ان الهوا سم مصفى = ومن قلد يبا يلقى الهواني
ابن فرناس قلد له حمامه = وطاح ومات واثر العمر فاني