قدر المسافة بيننا رمية الرمح = ابعد عليك شوي من ضربة السيف
لكن رمش العين مع وجهك السمح = اشد من ضرب السيوف المراهيف
اغضاء ثم نظره ثم اغضاء ثم لمح = خلاني اكتب لك وازيد التواصيف
اقلط على قلب كتب باسمكم وامح = كل البشر الا انت والحب والطيف

يقبل بي الشوق لديارك ويقفي بي = آقف على بابكم وارجع وانا ضامي
مدري غرامك حبيبي وش مسوي بي = يا اكبر طموحي وعشقي واعظم احلامي

في كل شيٍ تعذر لي وانا اعاتب = الا الخيانه وطار البعد والفرقا

ناح الحمام وضايق الصدر ماباح = الا على سجع الحمام ونحيبه
نقض عليه جراح واستشمم جراح = جرح المفارق وين احصل طبيبه
اثر الليالي في مواجيبها شحاح = واثر الحبيبه ماتسمى حبيبه
الا بعد بُعد ومواجيع وصياح = زود على طعم القهر والغليبه