من امس الصبح والخاطر عليه من الهموم حمول = ادق الكف فوق الكف .. اقول الناس مسروره
اشك اني وحيد الحزن .. اقول بخاطري لحول = وانا اللي كنت محسب للزمن لو زاد في جوره
ذرف دمعه شكا عاشق بدت به رحلة المجهول = سكت لايبدي الخافي بعد نوره طفا نوره

لاتسالين الجرح ياقرة العين = او ليه شعري غارقٍ فالصبابه
هذي حروفي فسريها وتدرين = مافيه شي يدعي للغرابه
بعطيك تفسيري ومعه البراهين = هذا انا (شاعر وقلبي ربابه)

تدري وش اكبر ظلم من ظلم الاقراب = ظلم الحبيب اللي تضحي عشانه
تتعب لجل عينه وتسهر وتنصاب = وهو يذوقك القهر والاهانه
تقول له ضحيت ويرد ( نصاب ) = جحود والا ذي تسمى ميانه

الا سمعت اللي على الدوح ساجع = اقول ماينلام لو زاد سجعه
نقض علي الورق كثر المواجع = وانا بقلبي زايد فيه وجعه

بعض العرب لو يغيب سنين عن عيني = ماشلت همه ولا شاقتني علومه
الا انت ياللي بسلم الحب تغريني = لو غبت لحظه حرمت الجفن من نومه
اسهرتني يوم خلق الله مريحيني = واضنيت قلبٍ غدا زاده ومطعومه

كم كنت طامع بقلبك بس بالصدفه = عرفت بان القناعه كنز لايفنا

تدرين وش معنى الغلا والتفاهم = انك تصافيني على كل الاحوال
وتدرين وش معنى الوفا ياغلاهم = اني جعلت القلب للحب مدهال

خلوني ابدع مواويلي واغنيها = اطرب هجوسي وارددها والحنها
لعلي ادله عن الدنيا ومافيها = مادام جار الزمان وردني عنها

هموم القلب يامحمد على قلبي تجي وتروح = تواردني كما رسٍ بقفر ودايجه همله
يروده من حداه القيض فالطرقه بعيد الشوح = عقب مابعد المضما وشاف النقص في زمله
ابشكي بس من يشفي جروحٍ خالفتها جروح = مصايب يالله الكافي على ماقيل مكتمله
احسب اني كتمت الهم واثر الهم بي مفضوح = على وجهي بدا رسمه عسى الله لاجمع شمله
اقول : اقول .. لا والله ما اشكي لو تروح الروح = وانا اللي لا ارتكا للكايده ما يشتكي حمله
على قد الصدور تبين الهرجه ويبدا البوح = على ويش التكبر والنبي قد خاطب النمله
وابو نفسٍ خبيثه مايعطر داخله لو اللباس يفوح = وكم نفسٍ كريمه ما تذل لو تلبس الهمله
تعبت ولاشكيت الضيم وطحت ولا نويت انوح = شربت الغدر لكني حشا ما ابدل العمله
الي مبدا ولي شيمه ولي هرجه ولي منضوح = اقدر من يقدرني واسامح وادمح الخمله
والامني عرفت الهرج يجرح صاحبٍ ممدوح = كضمت الغيض في نفسي حشمته ما اتكلم له
تناجيني همومي لين زاح الليل ضاح الضوح = واخاف اقفي وانا باقي بوسطي تدّرج جمله
قبل يبدا النهار ويبحث الخافي حمام الدوح = يهيض هاجسي نوحه كما وجهين للعمله
الا ياهم لاتقفي اخاف الشعر معك يروح = تربع فالحشا وارو الورود وطيب العمله

عزوتي لاقلت قطمان المحازم = ماتراخا محزمي وانتم حزامي
يوم بعض الناس باروا فاللوازم = ماتبور ابهم رفيعين المقامي
ورث جد وطيب ساس بقلب جازم = فالمواقف و الشدايد دوم حامي
كل شغموم على الطالات عازم = عقبه لو ماخذا الصف الامامي
يوم كان الوقت مهزوم وهازم = فعلنا يشهد لنا شرق وشامي
فعلنا مثل الرعود اللي ترازم = ترعب وتروي خفوق كان ضامي
العدا فنحورنا قامت تقازم = عقب ضرب بالمشوك والحسامي
كل خشم به عرام يجيه خازم = وكل عين تستحد الها عدامي
السباع بفعلنا قامت تعازم = تقنب وتدعي بعض والفعل حامي
من خلقنا والضفر معنا ملازم = ماخلق فينا جبان ولا انهزامي
كان ماصار الفتى بالفعل حازم = مايجي له ذكر من بين الانامي
ومن تجاهل فعلنا ماهوب لازم = يكفي انا قد تملكنا السنامي
ثم وقفنا درع للعدوان كازم = فتش وتلقى براهين لكلامي
عزوتي لاقلت قطمان المحازم = ألكم التقدير مع كل احترامي