تساومني على الذكرى وانا قلبي غدا تذكار = وشال من الهموم اكثر من اللي شالت اوراقي
سقيته من زلال العشق لين استظهر النوار = وذبل الورد ياكافي بعد ما وقف الساقي
وسكنتك معاليقي وغنا لك حمام الدار = سجع لك واطرب اسماعك ولج الصوت باعماقي
بنيت آمال في قربك وخابت والفلك دوار = اجي لك طالبك قربك واثرك تدور فراقي
شعلت النار في جوفي ولا به نار تطفي نار = ولا يطفي لهيب الجوف دمعٍ غرق احداقي
بدون اسباب تهجرني وتتركني بدون اعذار = ولا حسبت لجروحي ولا حسبت لأشواقي
بودع واكتم جروحي ولاني سائلك وش صار = بعد ماحلت الفرقا دخيلك بس وش باقي
بودع والنوايا بيض ومن ذنبي تراك مجار = حفظتك في زمان العشق وببقى عند ميثاقي
اصونك وانتشي بسمك واخط من الغرام اشعار = وطيفك لو يطول البعد احفظه وسط خفاقي
وسر العشق في قلبي مصان ومن وراه اسوار = ولا تهتم للباقي تراني بحرق اوراقي