يقول عبدالله يام اكبر همومه = وان جات فالميزان ترجَح عزومه
لي ونة كنيتها عن عواذلي = وعن شامت بالهرج تومي كمومه
يفرح بغرات العرب في غيابهم = واللي سمع له زاد حسده ولومه
ونة قهر ماهيب ونة رخامه = ولاهيب ونة عاشقٍ طار نومه
اجاهد الدنيا وعيت تطيعني = وامسيت نفسي من غثاها كتومه
باعت كرام الناس في سوق همها = والطيب مايشرى ولا احدٍ يسومه
وحيد همي والروابع تحوفني = حوف السباع اللي عدت من رجومه
يامشعل اسمع خذ كلام مصفى = من منصحٍ لك ماكذب في لزومه
يغوص غبات الهموم الغزيره = والشط يعرف غبته قبل عومه
الرجل لاجيته وعقد حواجبه = لاترتجي مده وتقبل علومه
اسكت ولاتبدي له اللي بخاطرك = اصلا جلوسك مع جنابه نقومه
ياخوك بعض الناس يفرح بشكوتك = لاخير لاذمه ونفسه ظلومه
والطيب ادمح زلته لو تكررت = خذها نصيحه بالدليل محكومه
لابد من يومٍ تبين مواقفه = يزيح هم اللي تلبد غيومه
والاش لاتقبل منه ربع مزحه = والا تلومه او تسمع للومه
هذا وفيه علوم ما اقدر اقولها = بيني وبينك والرموز معلومه