المسافات الطويله والخطاوي والليالي
والاماني والعزايم والمراقيب المنيفه
والهوى وأنفاس حزني والمقاديم التوالي
والنحايف والشظايا وابتهالات الكفيفه
والسحايب والبيارق وإنكسارت المعالي
والهبايب والرمال اللي حكت غزوة خريفه
والعزاوي .. وشبت النار .. ومعاميل الدلالي
والمداحم والسواني وصرخة .. حبال ٍ نحيفه
والقصص ومكازز الفرّيس وقروم العيالي
والقصايد والجنايز والمناخات المخيفه
كلهن يا سعود في عمري مبانيهن .. ظلالي
والمعاني مست ّ أحبال ٍ بغيّتها .. مريفه
فاخر الفكر المعتق سال في حضرة سبالي
وفاخر الدمع إتعصب بالهواجيس الكتيفه
ابعد الواقع وناولني رسن مهرة خيالي
واستمع ياخوك شاعر لا بغى ينزف نزيفه
يالرفيق الحزن بيّن في عيوني وفالموالي
تحت صدري قلب ما يبكي فراقه عن وليفه
يا سليل المجد يا معرب عمامك والخوالي
سوق لي فنجال من يمناك يمناك الشريفه
دام في راسي عقل ما هجّروني بالعقالي
انصت ان جر ّ البيّاني من قوافيه وعزيفه
عايش ٍ راضي بحلي ّ مير يا كثر ارتحالي
بين صفقات السنين وبين ضربات الرهيفه
الحمول اللي على متني رغت منها جمالي
يوم غيري تطربه جرّات وحمول ٍ خفيفه
والله إني ما شكيت القلب ولا القلب اشتكى لي
مير مر ّ الوقت زاحم من رصيفي في رصيفه
يالرفيق اقرن بيوتي حل ّ معقود الحبالي
لا قريت البيت تلقى البيت يحكي عن رديفه
