ياسعود .. ماللشعر ( سكره ) و ( تعميره )
اكتب قصيـدي علـى شفـيّ ومشهاتـي
ما نيب من قوم ( تطويله ) و ( تقصيـره )
اتعـب علـى حبكتـه واحـط بصمـاتـي
لـو كـان ماهـو بقـرآن ٍ ولا سـيـره
يـا كثرهـا مـن نجاحاتـي وهفـواتـي
والمـدح ماهمنـي شــره ولا خـيـره
فـالشعر يـوم الشعـر ترديـد الابياتـي
المـدح فـي غيبتـي .. عـزّي وتقديـره
هو مطمعي فالعمـر حومـي وصولاتـي
المدح ... في عزوتي عزوة ( اخو ذيـره )
يوم ان بعض العرب مثله كما .. الشاتـي
المـدح .. فالماقف الغصّـاب والجيـره
وياحبنـي مـن نقـد سهـوي وسيّـاتـي
والشاعر اللي علـى الشبـاك .. تشهيـره
بعديـن ينـدم ليـا قطـر العمـر فاتـي
الحـظ لامـن تعلـت ّ لــه مزامـيـره
قـام ايترقـص علـى دربـه ولا بـاتـي
مـا نيـب والله بحـر واعطيـه تقـديـره
مير الزمـن يصـرف اسنيـن ٍ جريّاتـي
يـا قـوم ياشاعـر ٍ كثـرت جماهـيـره
استـغـفـر الله ولا ودي بـرمـعـاتـي
يبا .. العُلا مير حدّر له بدحديره
من دون في دون وسجّل .. بالملفاتي
اليا انتهى الدرب حسّـب فـي مخاسيـره
مثـل الـذي يحسـب انجـوم السماواتـي
روليت ياذالشعـر يـا سـرع .. تدويـره
والله يعينـك علينـا يالـعـرب سـاتـي
والشعر لا بـد ّ إلـه ختميـن .. تأشيـره
صدق المشاعر وروح إلهـام مـا ماتـي
مير المهـم .. مانبـا .. قيسـه وتمتيـره
كـل ٍ يـوّرد عـلـى جــمّ الثمينـاتـي
الرجل فـي ماقفـه .. يحمـى مصاديـره
والضعف ما عاش به مـن يامـن الآتـي
ياخـوك لـو الزمـن يعـرف مناعـيـره
اتشوف بعض العرب فـي جيـب مخباتـي
مدامنـي مـا شربـت الـذل مـن زيـره
لبى ضمـى العـز ّ لـوّه يجـرح الهاتـي
وان عودت للقصيد الذرب .. تصخيره
ابشر وانا شاعر البيّان.. لا تحاتي
بيتين يكفنّي .. الموضوع ثم ديره
اخفاف للسمع فالمعني .. ثقيلاتي
الليـل حبـر السهـر واقلامـي الحيـره
والطرس ما يجمـع اشواقـي ولا اشتاتـي
لا صـار حيلـي يبـوج الظلـع والديـره
عليـه منـي نعـم واجــزل تحيـاتـي
