سلطان بلّغ داعج العينين في وضح النهار
كلام مني يارفيقي وأحفظه شطر ... شطر  

 
ما أبيه خفية يالرفيق أبيه يالصاحب جهار
أبي كلامي يا عميل الخير تقراه البشـــــر  

 
للصاحب اللي ما قسى قلبه ولا حوله بوار
الصاحب اللي عاذره وأبيه يلقالي عــــذر  

 
الصاحب اللي ساقه الله لي بعد طول انتظار
لكن خذاه الوقت عني يا رفيقي ما أنتظر  

 
والله يا لولا إيمان قلبي بالقدر لاصل شهار
لكن إيماني بالقضاء يا صاحبي هو والقدر  

 
يردّني عن كل ما يغضب عزيزٍ به نجـــــار
رب العباد اللي إليه الملتجئ والمستقــــر  

 
في ذمتي ما له شبيه بكل من تلبس سـوار
ما شفت لي من يشبهه في باديه والا حضر  

 
اللي جمع ربي جماله من بياض ومن سمار
ما أقول يشبه للقمر في ذمتي انه قمـــر  

 
قل له يشاهد طيحتي ما بين ذلٍ وانكســار
قل له زمان أهل النجاسة والتفاهات أنتصر  

 
وقل له بغيب وغيبتي يا صاحبي آخر قرار
وأنا أدري أن غيبة دقيقة عن مقابلها دهر  

 
قل له بغيب وخافقي مابين غار وبين نــار
مدري أسبوع أو هي سنه يا صاحبي والا شهر  

 
قل له بغيب وشوقي لعينه مخليني مزار
في ذمتي يا جوفي لشوفة عيونه منفطر  

 
قل له بغيب ونومي من العين في غيبته طار
وشلون يهنالي منام وصاحبي لجلي سهر؟  

 
لا والله الا بسهر لطيفه وأناجيه بوقار
يا كم طيفه في أحزن اللحظات وأسعدها عبر  

 
قل له بغيب وشايلٍ له في الحنايا 1000 دار
وأحفّها لعيون محبوبي بريضان وزهر  

 
قل له صفى جوي ولكن كدّره بعض الغبار
وأرجي من الله ينزل الرحمة على قلبي مطر  

 
قل له موفق جعل داره من عمارٍ في عمار
الصاحب اللي وافيٍ بالحب ما عمره غدر  

 
قل له نصيحة يا الخوي لا يستمع هرج الصغار
والله كبير وخابره عن هرج عذّاله كبر  

 
وقل له دخيله لا يكدّر خاطره ما صار صار
أمرٍنٍ من الله لا اعتراض لأمر ربي لا أمر  

 
والله يهني خاطري من قبل قصّاف العمار
بشوفة اللي شوفته عندي ثواني عن عمر  

 
سلطان لا تشره عليّه الزمن بالحيل جار
والا رفيقك ثابتٍ ياما على الشدّه صبر  

 
عين الزمن أشوفها يا صاحبي تقدح شرار
والجوف والله يا رفيقي والعٍ كنه جمر  

 
سلطان بلّغ داعج العينين عني باختصار
والله لا أموت ولا ملى عيني بعد زوله بشر  

 

 

 
وسلامتكم جميعاً