عزالله أني جايزٍ عن هوى البيض
مالي على طرد الغنادير حاجه
لو كان قلبي فاض بالشوق ويفيض
ودايم معاقبني بكثر أشتياقه
خصٍّ ليا شاف الجعود المناقيض
جرّه هوى نفسه وحدّه وساقه
لكن لا شفته عروقه مقابيض
أحرص على قلبي وأجوّد وثاقه
وأنفّضع بالعلم والعرف تنفيض
والعشق ما بيني وبينه علاقه
عطيت من له بالهوى شف تفويض
وجنّبت عن درب الهوى وأحتراقه
ما ني من اللي ينشرون المعاريض
أرفع مقامي عن فعول الحماقه
وأن جاتني زلّة رفيق أكظم الغيض
ولا أرد نفسي للعلوم الدقاقه
ويرزقني الله جل شانه بتعويض
باللي جبينه كالبدر في أنفلاقه
أنا هوى بالي ومشهاي يا معيض
في خايعٍ ما بين بكره وناقه
وشوف الحبارى وأم سالم مرابيض
مع شوفة الحر الندي وأنظلاقه
والمنظر اللي دون صورة وتحميض
وشوف السماء صافي وينعش زراقه
في ذمتي للجوف طبٍ وتمريض
شوف القطا لو كان شوفه شفاقه
مع ربعي اللي للمراجل ركاكيض
رفاقةٍ يا حيّهم من رفاقه
ما ردّنا حر اللواهيب والقيض
بيت الشَعَر بالطيب نرفع شناقه
وأنصلي لرب المخاليق ونفيض
على علوم أهل الكرم واللباقه
ما بينهن سبّه ونمّه وتحريض
حتى المنافق ما نطاوع نفاقه
ويرومس الخفاق بالشعر ويهيض
وأغني أبيات القصيد برواقه
وأروّض القاف لمعانيه ترويض
وإذا بدعته ما تخلخل سياقه
والله يديم الأمن والخير يا معيض
وأبن العراق الله يحرر عراقه
وسلامتكم جميعاً
