بعد المسافه ماينسيني محبته وغلاه
لو طالت المده تراني صاحبه مهما يكون
عهدٍ علي اني لاوفي والعهد مني خذاه
من قبل لا سافر وبعدي عنه والله مايهون
حبي له اكبر من جبال طويق وجبال السراه
وشوقي له اكثر من نجوم الليل في ليل السكون
ياكثر ماشافت عيوني بس وينه مستواه
الا بقول انه لحاله يالعواذل وش تبون
الغيد كل الغيد من زينه يخليهن وراه
فيه الجمال اليوسفي والموت لا شفت العيون
هذاك في قلبي مكانه ياسعد يوم اهتواه
وانا على شانه بدعت القاف من زين اللحون
ازعل ليا منه زعل ورضاي والله من رضاه
يعني تراني مع حبيبي وين ماوجه يمون
يحداني الشوق الكبير ويمي الشوق يحداه
والمشكله ماهي كذا الا محبتنا جنون
يفرح على لقياي من حبه وانا افرح في لقاه
الله يبطي في حياة المغرم الترف الفتون
اللي ليا طالت بي الغيبه فراقي ماقواه
يرسل مناديبه وراي ولا تغيره الظنون
اتعب عيونه بالسهر زوّد على عمره شقاه
كله لجل يرتاح قلبه من تفاكير الشجون
أحيان اله زلات لكن ياسعد بدمح خطاه
محبته تفرض علي ارئف على القلب الحنون
بعد المسافه بيني وبينه ملازمني غلاه
والله ما انسى صاحبي ولا الغلا مهما يكون
