يجوز شي .. وشي لا يمكن يجوز
لكن ما ادري كيف تالي الوقت جاز
ياصاحبي لو كنت أنا طيب وأنوز
قلبي من أفعال الزمن والوقت ناز
صدري مولّع مثل توليع القزوز
حتى الزمن من فوق ناره صب قاز
كيف البنادم في حياته ما يجوز
عن مبدأ الخبث العلن والإنتهاز
سهمٍ بجوفي يا ملا صار مغروز
هشّم ضلوعٍ كسرها كسر القزاز
وكل الهموم أضوت على القلب اللزوز
وصارن على قلبي وخفّاقي عزاز
تدافعت بين الحنايا جوز .. جوز
من دون تأشيرة ولا حتى جواز
وياصاحبي ما دمت غالي ومعزوز
سجّل علومي مثل تسجيل الجهاز
كل النفوس اللي بلا مذهب تبوز
وكم واحدٍ من خوّة أهل الخبث باز
ونهايته ضرب المكينه والفيوز
يومن غيره في علوم الطيب فاز
الطيب ورث اللي على الجزلة يحوز
وفي المرجلة نال الشهادة بامتياز
والضعف ورثٍ للعجوز بن العجوز
اللي بفعله لا يجيز ولا يجاز
والماكر اللي ما تعلاه محجوز
والبوم عمره مايجي في وكر باز
والذيب ما ينهاز هو اللي يهوز
واذا انكسر نابه من الحصني يهاز
واللي يجي في الماقف العسر مهزوز
يصبح ضحية من ضحايا الإهتزاز
أبرز لخصمك وانت ضاري بالبروز
في نجد والا يوم كنتوا في الحجاز
من لابةٍ يوم اللقا تشبه ( كروز )
أقولها من دون ميلة وانحياز
يا صاحبي أفهم بعد فك الرموز
أفهم ترى قلبي من الرديان جاز
وفي ملعب الدنيا اذا ودك تفوز
خلك بتشكيل المواجيب أرتكاز
وشت من يعيبك ياعميل الخير بوز
وخلك لربعك باب فخرٍ واعتزاز
واللي يقول انك مع الوقت محروز
احفر بعلمك وسط جوفه ارتواز
ويا صاحبي لا شفت شيٍ مايجوز
أبعد وخلك عن بلاويهم مجاز
وسلامتكم جميعاً
